اليوم ابن النبطية، وابن طرابلس، وابن عكّار، وابن بشرّي، وابن جونية، ما عندهم زبالة مثل الخلق، ولا مي، ولا كهرباء، ولا واي فاي — لأنّه وزير مخانق مع وزير، أو وزير مخانق مع رئيس حكومة أو رئيس مجلس، أو الرؤساء خانقين بين بعض.
إذا سمحنا لهالمناطق تنظّم حياتها اليومية حسب ما يرتضي سكّانها، معناتها بدنا نسمح لهالمناطق يكون عندها نوع من الاستقلالية المالية: تقدر تجبي الضرائب حسب مين ساكن عندها، وتقدر تصرف وتطوّر حسب منطقتها، لحالها أو مع البلديات اللي حواليها.
هيك عم ننتقل من السلطة المركزية إلى اللامركزية الإدارية: بروح لعندك، بتجيني خدمة، بحصّل ضريبة بالنبطية، بتجيني خدمة بالنبطية — بدل ما كلّ الضرائب تروح للسلطة المركزية اللي عم تفرّط فيها أو عم تصرفها على غير ناس.
بعدين، عندك مشكلة إذا كان في مناطق بدها تعمل زواج مدني ومناطق ما بدها؟ عندك مشكلة إذا كان في منطقة بتقول «ما بدنا كحول» ومنطقة تانية بدها؟ بالأساس عنّا أربع ثقافات — درزية، سنّية، شيعية، ومسيحية — المفروض تكون مصدر غنى للهوية اللبنانية. ما فينا نفرض على مجموعة معيّنة شي ما بدها تعملو (مثل أحوال شخصية موحّدة والكلّ بدّه يتزوّج بنفس الطريقة) — هيدا ضدّ المبادئ.
معناتها عم ننتقل من اللامركزية المالية إلى اللامركزية التشريعية، اللي هي الفيدرالية. بالنتيجة: الفيدرالية هي جَمْع اللامركزية الإدارية والمالية والتشريعية. هذا بالمختصر المفيد.