الضيف: الفيدرالية بالأخير شغلتين، حوكمة نظام حوكمة رشيد من ميلة ونظام إدارة تعددية. هيدول الشغلتين بتأمنن الفيدرالية لأنو الإسم التقني تبعها هو الإمداد Principe de Subsidiarité. هيدا الإسم التقني لمشاريع الفيدرالية ما في شي اسمو فيدرالية إذا ما بترجع لشي اسمو Principe de Subsidiarité.
المحاور: خلينا نبسط الأمور قدر الإمكان إياد.
الضيف: اوكي، شو هوي، هيدا مبدأ بموجبو بتنعطى السلطة المحلية الأصغر هي البلدية كامل الحرية لتقرير مصيرها، هيك بالدستور السويسري بالـ Article 5، هيك بالدستور الألماني بالـ Article 23، هيك بدستور لا كومونوتيه اوروبيان بالـ Article 5 باراغراف 1 و 2، بالكيبك ذات الشي الخ.
المحاور: بما معناه؟
الضيف: بما معناه، وهون بركي في تناغم أو بدنا ننتبه، نحن ما بيمنع إنو نجي نقول بدنا نبني من تحت لفوق سلطتنا، السلطة اللبنانية الجديدة بموجب هالعقد الاجتماعي الجديد اللي عم نطمحلو بيسموها باللغة العربية الإمداد مبدأ الإمداد أو الحوكمة التصاعدية Principe de Subsidiarité ترجمتو يعني، ما بيمنع إنو نتطلع ببعضنا نحن كأفرقاء بلبنان نقول يا جماعة هيدا البلد الحوكمة تبعو فاشلة نقعد على طاولة ونتفق على صيغة جديدة سميا شو ما بدكن ولكن مبنية على مبدأ الـ Principe de Subsidiarité، بغض النظر عن شو بيصير مع إيران وشو بيصير مع سوريا وشو بيصير مع كذا، أنا برأيي هيدي طريقة نقدر نبني نبلش نرجع نبني من تحت لفوق Ground up، Bottom up، نظام اجتماعي جديد شفاف قادر إنو يأمن الخدمات اليومية لأنو مش عنقّ بلا مي وبلا كهربا وبلا إنترنت.
المحاور: هلأ رح نشوف الإطار العملي لتطبيق هيدي الفيدرالية.